Boletín Informativo – 18 de Xuño 2018

BOLETIN_PC_2Luns, 18 de Xuño 2018

R0010377

Actualidade de Proxecto Cárcere

O pasado xoves 7 de xuño de 2018 asinamos xunto co Concello da Coruña a formalización do documento para a dinamización sociocomunitaria do Cárcere, onde a memoria histórica teña un papel relevante.

Nesta primeira fase farémonos cargo da nave de entrada, de aproximadamente 200 m2. Gradualmente iranse abrindo outros espazos para o uso, así que se vaian realizando as obras de rehabilitación e acondicionamento necesarias.

A pesar de que as dimensións do espazo e condicións de uso variaron con respecto ás estipuladas na convocatoria de concurso do ano 2017, e a demora na entrega do espazo foi considerábel, en Proxecto Cárcere decidimos continuar co proceso por unha cuestión de coherencia cos nosos valores e obxectivos fundacionais: o coidado e apertura do cárcere por e para a cidadanía.

Estamos por tanto nun momento ilusionante onde despois de 7 anos de reinvindicacións, moito traballo e con moita xente aportando ao ideario que hoxe en día conforma Proxecto Cárcere, podemos comezar a poñer en práctica un soño común aberto a todas.

Gustaríanos poder abrir xa o espazo con liberdade e sen restricións pero nos encontramos no medio dunha das últimas obras que consideramos imprescindíbeis para abrir realmente para todas. Estase a finalizar a adaptación dos baños para facelos accesíbeis, así como a colocación dunha rampla que salve as escaleiras de entrada.

Estas obras levarán aproximadamente unhas tres semanas en ser completadas. Un tempo que aproveitaremos para limpar e acondicionar o espazo e preparar os protocolos de funcionamento e xestión para facilitar a entrada de persoas e colectivos á vida do Cárcere.

Estado do Cárcere

O estado do cárcere, como xa informáramos hai meses, é complicado. Esta foi a razón principal que nos levou a aceptar a dinamización coa merma de condicións. Pensamos que vai ser só habitando o espazo, aínda que sexa unha pequena porción, o que vai enfocar a atención sobre o edificio, sobre o seu potencial e valor e o que facilitará as accións de recuperación do mesmo.

Un dos factores esenciais tanto para nós como para o Concello da Coruña é garantir a total seguridade das persoas que imos utilizar o cárcere. Isto cúmprese nos espazos a ocupar durante a primeira fase de entrada, tanto a nivel físico e estrutural como a nivel de permisos e seguros necesarios para o desenvolvemento de actividade pública.

Nas partes que se irán abrindo gradualmente ao público, e parte da convocatoria de cesión inicial, fican por completar as obras de accesibilidade, evacuación e rehabilitación. Durante o verán faranse parte delas coa posibilidade de estar finalizadas nos últimos meses do ano.

É evidente que o abandono absoluto do total do edificio durante 7 anos, nos que en multitude de ocasións apelamos ao sentido común e responsabilidade das autoridades competentes para tomar as medidas mínimas de mantemento, ten causado un deterioro que nós consideramos inaceptábel.

Por suposto, o cárcere aínda está a tempo de ser salvado. E este continúa a ser un dos nosos obxectivos e onde imos continuar a poñer enerxías. Volver a entrar estes días e revisitar a prisión tennos só confirmado da grande perda que sería para a cidade un espazo destas dimensións e características onde tantos e tan diversos proxectos cidadás poderían convivir, existir e crear cultura e comunidade.

Estado da nave de entrada

A nave de entrada, o espazo dispoñíbel nesta primeira fase de entrada, duns 200 m2, é pequeno, si, especialmente tendo en conta as dimensións do cárcere. E o estado en que nolo encontramos, a pesar de cumprir coas mínimas condicións de habitabilidade, era mellorábel, en particular no que se refire ao fin de obra, tendo nós que facer un traballo que tal vez non nos correspondería.

Porén, nós preferimos enfocarnos no positivo e aprender desta experiencia de negociación coas diferentes institucións e gobernos ao longo destes anos. Para poder non só avanzar con este proxecto pero tamén axudar a que outras posíbeis iniciativas surxidas da cidadanía podan facer uso do patrimonio público para fins comúns e socioculturais.

Se volvemos ás nosas orixes, aló polo ano 2010, unha das razóns polas que apostamos por unha xestión cidadá do espazo era por encontrarnos con varios exemplos de investimentos multimillonarios en “contedores” de cultura que ficaban baleiros de contido. Estes eran construídos sen ter en conta as necesidades reais das persoas, e a pesar de ser espazos de nova construción, con todas as facilidades e impecables en termos de deseño e limpeza, non conseguían atraer a xente, tendo que investir novamente na xeración de contidos desde arriba.

No cárcere queremos que suceda exactamente o contrario. Queremos que sexa a xente a que se apropie do espazo e sexa ela a protagonista da xeración de contidos que contribúan á cultura e expresión libre. Queremos que sexa ela quen decida que facer cos seguintes espazos que se irán abrindo e que a diversidade de ideas e sentires encontren un lugar onde poidan existir, experimentar e desenvolverse.

Será isto posíbel ou só un soño? Nós, cun pé dentro faremos todo o posíbel para que suceda. Por intentalo non vai quedar.

Grazas a todas as persoas, colectivos, organizacións, partidos políticos e medios de comunicación que durante este tempo compartistes con nós, en parte ou totalmente, o desexo de que outro xeito de facer cultura e sociedade é posíbel, e que unha xestión cidadá dos espazos públicos non era só necesaria senón imprescindíbel.

 

Agora, temos ante nós o fermoso reto de transformalo en realidade.

R0010367

Para saber máis escríbenos a proxectocarcere@gmail.com

 

Advertisements

Encontro Colectivos d’A Coruña

O sábado 11 de febreiro, celebrouse na Nave 1839, un Encontro con Colectivos da cidade d’A Coruña. Proxecto Cárcere foi convidado a presentar a súa traxectoria, e partillou micrófono con Stop Desahucios Coruña, Elvinha NON se vende, Centro Social Autoxestionado A Comuna, Ateneo Libertario Xosé Tarrío e o Centro Social Okupado Autoxestionado A Insumisa.

Tono e Laura, de PC. Gimp 2.6 cc-by-sa

Resultou ser unha tarde moi interesante, onde se puido ouvir e ver documentos nos que se rexistraban as andainas de cada colectivo, os seus obxectivos, e a maneira de traballar que desenvolvemos. Houbo preguntas por parte das persoas asistentes e clarificáronse moitas das inquedanzas que existen na cidade, e como, por medio destes movementos, se pode crer que hai moita xente que non se conforma co mundo no que vive, e que a aspiración humana a vivir en solidariedade, ben común e apoio mutuo, pode ser posible.

Pensamos que este día foi un punto de partida, cara a repetir esta experiencia e seguir en contacto directo con estes colectivos…

Forza!

Hortas no cárcere. Sementando e creando en Comunidade

Boas noites,

Proxecto Cárcere está de volta, e con moito movemento. Felizmente, comenzamos o curso coa boa nova da cesión dun espazo para sementar, nas novas hortas urbáns do Concello de A Coruña. Decidimos facer unha proposta de participación (que nos encanta), fuxindo de calquera prototipado rápido. É que a praxe é o que nos mola 😉

Velaquí vos deixamos o texto íntegro da nosa proposta.

PROPOSTA PARA AS HORTAS DO PARQUE CARLOS CASARES

PROXECTO CÁRCERE – CS A COMUNA

Esta proposta é presentada pola plataforma Proxecto Cárcere, que ten como obxectivo primordial a recuperación da antiga prisión provincial da Coruña. Debido a isto, o seu radio inmediato de acción sitúase no barrio de Monte Alto. Por esta circunstancia, e por compartir os seus principios básicos, a memoria que segue, así como o proxecto en xeral, está preparada coa colaboración do Centro Social A Comuna, un “proxecto de transformación e creación de comunidade“.

Vista do Parque Carlos Casares

Vista do Parque Carlos Casares

Obxectivos:

Proxecto Cárcere ten como obxectivo prioritario a activación e coidado da antiga prisión provincial e a súa contorna. Desde a súa creación en 2010 só nunha ocasión puido desenvolver a súa actividade dentro do edificio e ademais nestes 6 anos non tivo ningún espazo propio que empregar de forma habitual. Por isto, os obxectivos principais que se buscan coa horta, son:

  1. Xestionar un espazo en comunidade

    Pasar da teoría á práctica, xestionando o funcionamento dun espazo tanxible, neste caso, unha horta. O seu funcionamento seguiría os principios que ata agora Proxecto Cárcere desenvolveu maiormente nun plano teórico e ademais co engadido de que é nun terreo situado a carón da prisión, o cal é positivo desde un punto de vista emocional (a plataforma estaría traballando o máis preto posible do cárcere) e tamén porque permitiría unha maior e máis continuada interacción coa veciñanza máis próxima.

  1. Materializar unha das propostas do Plan de Viabilidade de 2012

    O plan de viabilidade de Proxecto Cárcere xa incluía a posibilidade de dedicar unha parte do espazo a hortas. Isto só sería unha realización previa a facelas dentro da cadea.

  1. Establecer sinerxias cxs habitantes e axentes do barrio.

    Como xa se dixo no punto 1 e sobre todo polo carácter aberto desta proposta, serviría para establecer vínculos co barrio. De forma máis directa co centro social A Comuna. Polo seu xeito de funcionar (horizontal e aberto á participación de calquera persoa) e pola súa localización (barrio de Monte Alto), existe unha gran afinidade entre ambas iniciativas e ambos grupos consideran que este proxecto sería un marabilloso xeito de establecer unha colaboración máis alá do puntual.

Persoas destinatarias:

  1. Por razóns obvias, aquelas persoas que están a participar máis activamente, tanto no Proxecto Cárcere, como n’A Comuna (que son á fin e ao cabo quen están promovendo a idea), pero o obxectivo de ambos grupos é que poida participar toda aquela persoa que así o desexe. Buscárase que o rango de idade sexa o máis amplo posible.

  2. Debido a experiencias previas na horta situada no parque de Oza, vemos esta actividade como unha gran forma de participación das persoas maiores, que adoitan estar menos presentes na vida social da cidade ou cinguidas a actividades moi particulares e moi dirixidas. As hortas serven para poñer en práctica e transmitir os seus saberes, que en moitas ocasións non recoñecen como tal.

Metodoloxía:

  1. A praxe levada a cabo estes anos de Proxecto Cárcere conleva exercer unha mínima organización e deixar que cada persoa que interveña no proceso puntual, teña o rango de propoñer ideas para seren debatidas, no caso dun horto, sería tamén un lugar de conversa, de afecto, de sociabilidade e o máis importante de aprendizaxe.

  1. Horizontalidade e consenso.

Planificación e actividades:

  1. A propia natureza da proposta dos hortos, relaciona a planificación co sentido común. É dicir, queremos traballar a horta da forma máis achegada aos propios ciclos naturais.

  2. Un dos destinos principais dos produtos que dea a horta é ser empregados no xantador comunitario que xa se vén desenvolvendo os domingos na Comuna. Este xantador é aberto a quen desexe tomar parte nel e é un xeito de crear unha comunidade en torno ao centro social.

  3. Dentro da plataforma Proxecto Cárcere está a cooperativa Zocamiñoca. Pensamos que a horta pode servir tamén para desenvolver actividades conxuntas con ese colectivo.

  4. Fomentarase a participación da veciñanza, tanto no día a día como en potenciais actividades puntuais.

    Vista do Parque Carlos Casares

    Vista do Parque Carlos Casares