Animádesvos a vir poñer o Cárcere fermoso?

Convidámosos a dúas Xornadas Abertas de Limpeza e merendola no Cárcere:
  • O mércores 11 de xullo, de 17h a 21h.
  • O sábado 14 de xullo de 17h a 21h.
As moradoras do Cárcere estamos a traballar en poñela bonita e sacarlle lustre de cara a súa presentación en sociedade nas vindeiras semanas. Queremos convidarvos a colaborar connosco nestas tarefas e limpeza e pequenas obras de mellora. Temos moitas tarefas na nosa lista! Seguro que algunha vos ha prestar!
photo5913588956757339587.jpg
Ás que vos animades a vir botarnos unha man, convidámosvos a merendar conosco: café, te, zume, pastas, froita e boa compaña. O que si, vide con roupa de trote, que o Cárcere deixa pegada!
photo5859703111650749821.jpg

​Se vos morredes por coñecer o Cárcere ou reencontrarvos con ela e tedes un oco algunhas desas tardes, aquí vos esperamos!

Un saúdo,
Equipo de Loxística e Fermosura do Cárcere
Proxecto Cárcere
Advertisements

Boletín Informativo – 8 de Xullo 2018

BOLETIN_PC_2A Coruña, 8 de Xullo 2018

E como van as cousas no Cárcere?

Pois as obras interiores do espazo co que imos abrir xa están rematadas. Temos o baño adaptado terminado e xa temos algúns mobles cos que comezar a funcionar. E café e wifi!

photo_2018-07-01_22-10-31

Habitat social e Espiga vannos axudar cos traballos de acondicionamento. Moitísimas grazas!

Fáltannos as rampas de acceso. Xa comentamos que para nós é fundamental que todas poidamos entrar no Cárcere. Comunicámonos co Concello para que nos deran información ao respecto.

E case rematando o Manual de Funcionamento, do que xa podedes ver cada vez máis información no noso blog.

No Cárcere podemos participar todas, tanto asistindo a eventos ou achegándonos a coñecer o espazo, como presentando actividades puntuais ou proxectos de medio-longo prazo.

E tamén, e o que diferencia este proxecto doutros, é que ti podes ser parte do traballo común de facer que todo isto sexa posíbel. Podes participar na organización ou simplemente axudar con algunha das tarefas que se van presentando.

photo_2018-06-15_19-40-46

A cidadanía collendo a responsabilidade e capacidade de toma de decisións sobre os espazos públicos, sobre os seus usos e priorizando as súas necesidades sobre outros intereses, é un dereito e unha oportunidade que nos ofrece o Cárcere hoxe.

Se queres saber máis contáctanos en proxectocarcere@gmail.com

E por último, pero non menos importante, avisárvos de que andamos xa a preparar unha nova Xornada de Benvida, para aquelas que queirades participar no Cárcere, e unha Festa de Apertura á que estades todas convidadas das que daremos datas en próximos boletíns.

Unha aperta forte

Boletín informativo – 26 de Xuño 2018

BOLETIN_PC_2

26 de Xuño 2018, A Coruña

O pasado venres encontrámonos cos proxectos que levaban pacientemente esperando durante meses a apertura do cárcere. Co espazo disponibel minguado e un uso máis restricto algunhas iniciativas non poderán realizarse nesta primeira fase de entrada.

Asociación culturais, aprender a tocar a gaita, conectar as mulleres do barrio coa historia e futuro do cárcere, así como actividades sobre a mobilidade en bicicleta, son algunhas das ideas que se achegaron e que esperamos podan comezar a súa actividade en breve.

Agora toca dar paso a novas propostas e é aqui onde precisamos da túa colaboración, tanto considerando facer unha proposta ti ou o teu colectivo como divulgar entre xente que poida estar interesada.

Actividades e proxectos non é a única maneira de entrar no cárcere. No noso blog creamos un apartado especial onde explicamos que se pode facer e como. Seguro que encontras algo con xeito para ti.

ENTRA NO CÁRCERE!

Aos poucos iremos actualizando a información desta sección e adecuando outros apartados para este momento en que pasamos da teoria e do soño á práxis.

Ficade atentas.

proxectos 1

Reunión cos Proxectos

Asemblea de Maio 2018

Asemblea de Maio de Proxecto Cárcere terá lugar o domingo 27 ás 19h no local do CSA A Comuna (Rúa do Polvorín, 35).
 
ORDE DO DÍA

1. ORGANIZACIÓN ASEMBLEA (5 minutos)

2. RELACIÓNS CONCELLO (30 minutos) – GdT Relacións co Concello e Grupo Coordinador

3. COTAS E ACTUALIZACIÓN SOCIAS (10 minutos) – GdT Comunicación

4. MANUAL DE FUNCIONAMENTO (20 minutos) – GdT Xestión e Xurídico

5. PROPOSTA CONXUNTA CAS OUTRAS ASOCIACIÓNS DE AMPLIACIÓN PARCELAS DA TORRE (5 minutos) – GdT Hortas – Tono

6. ACLARACIÓN CAMBIOS NA DIRECTIVA DA AC PROXECTO CÁRCERE (10 minutos) – Tono

7. LEITURA DE ACORDOS DA ASEMBLEA E FECHE (5 minutos)

 

As Asembleas de Proxecto Cárcere son abertas a todas aquelas persoas e colectivos interesados e afíns aos seus principios e obxectivos.

*Grazas ao CSA A Comuna por cedernos o seu espazo.

 

 

Boletín informativo de Proxecto Cárcere – 1 de Maio 2018

Este domingo 29 tivemos a Asemblea de Abril onde avanzamos nos pedidos do Concello da Coruña para efectivizar a entrada no cárcere.

Aprobamos a contratación do Seguro de Responsabilidade Civil e a reformulación de proxectos que se adapten ao espazo que finalmente poderemos ocupar.

Estamos á espera do borrador do contrato para ser aprobado en asemblea e asinado por Proxecto Cárcere. Esperamos que nesta semana teñamos este documento para poder por fin materializar a entrada do proxecto, e por tanto da cidadanía a este emblemático edificio da Coruña.

En palabras das persoas técnicas todo este proceso non levaría máis dun mes desde a última reunión que mantivemos con elas. Polo que sería como moi tarde o 17 de Maio. Desexamos que se cumpra desta vez a data dada e non haxa máis demora.

Após 7 meses de paciencia e comprensión, toca agora que as palabras tornen feitos.

Nestes días estiveron a rodar escenas dun filme dentro do cárcere.

Alégranos que se estexa a dar acceso ao edificio pois alén de ser o adecuado denota vontade e capacidade de facilitar o seu desfrute e uso inmediato.

Queremos tamén agradecer aos colectivos e persoas que nos estades a enviar solicitudes de uso pola vosa paciencia e esperamos poder dar resposta positiva en breve.

Por outro lado informar de que estamos agora a utilizar un novo blog en wordpress xa que blogaliza deixou de funcionar nas pasadas semanas. Estamos a terminar de organizar todos os conteúdos pero xa podedes visitarnos neste enderezo www.proxectocarcerecorunha.wordpress.com

carcere

imaxe do espazo que se utilizará inicialmente

 

 

 

VOLVE ONDAS DO CÁRCERE!

Hoxe ás 19h escoita o programa de PROXECTO CÁRCERE na Cuac FM.

Falaremos da situación actual do proxecto, a entrada no cárcere neste mes e da Escola, unha das iniciativas xa en funcionamento que entrarán no Cárcere.

“A Escola é unha iniciativa de Proxecto Cárcere que ten como principal obxectivo dar resposta ás necesidades formativas do coletivo nos diferentes momentos que se presenten.

Desde formación en xestión de grupos, pasando por técnicas de biocostrucción, economía social ou desenvolvemento de proxectos culturais iremos creando un espazo de coñecemento no que todas seremos protagonistas.”

https://cuacfm.org/directo/

Información sobre A Escola

Sobre a Insumisa

 

En novembro de 2016 un grupo de persoas liberaban un espazo en estado de abandono coa proposta de coidalo e mellorar tanto o seu aspecto como a súa utilidade anterior. A Insumisa comezou co frío pero sabendo que ía mudar todo iso dándolle unha volta de 180º e virándoo un lugar cara á convivencia, a creación, a concordia e a equidade.

Nese mesmo mes, o Concello de A Coruña anunciaba o acordo logrado coa SIEP (Sociedade Estatal de Infraestructuras Penitenciarias) no que se asinaría un convenio polo cal o Concello tiña dereito durante dous anos prorrogables ao uso da antiga prisión provincial de A Coruña, o vello cárcere da Torre.

A primeira asemblea de Proxecto Cárcere despois desa nova, o 22 de decembro de 2016, fíxose na Insumisa. Para nós a elección e proposta deste lugar non era casual. Tanto a Comandancia de Obras coma o Cárcere estaban en estado de abandono, como moitos outros espazos na nosa cidade, públicos e privados.

Cando unha persoa, ou varias, están interesadas na permanencia dun lugar e o seu coidado, nunca debería ser posto en entredito, porque o mero feito de coidar, simboliza certa forma de convivir que leva implícito un sentir de respecto polo que nos rodea, sexa unha árbore, un camiño ou un edificio. Proxecto Cárcere aposta por estas premisas.

Para coidar neste caso do edificio da prisión, Proxecto Cárcere escolleu o camiño do diálogo coa Administración, o que, disque, é o “correcto”. Pasaron xa sete anos e, no mellor dos casos, a burocracia e a deixadez por parte das institucións fan que, como Comandancia antes, o cárcere estea tamén nun estado deplorable. Isto supón para todas as persoas da Coruña unha perda patrimonial á vez que dificulta o seu uso pleno e inmediato, agora que foi finalmente cedido do Ministerio de Interior ao Concello da Coruña e deste á cidadanía. Non parece entón que as canles que se nos ofrecen sexan moi útiles.

Pola contra, non é dificil encontrar casos, onde unha administración  durante anos e baixo diferentes gobernos utiliza o espazo público como refén para conseguir rendemento económico, electoral ou ambos. Por que non é este o debate?  Por que se permite e normaliza que unha institución actúe máis como un mero especulador que como un garante do patrimonio da cidadanía? Quen coidou realmente do ben común en Comandancia?

No canto dese desamparo institucional e excesiva demora en dar resposta a propostas cidadás de rehabilitación e uso participativo de edificios e terreos abandonados, a asemblea da Insumisa foi rehabilitando o espazo, dándolle uso e abríndoo a quen queira participar del e do proceso.

A día de hoxe non temos dúbida de que  a existencia  dunha diversidade de espazos comúns e de formas de xestión dos mesmos, é positivo para a cidade. Neste momento A Insumisa é o único CSOA da Coruña, e a súa desaparición  sería un golpe a este ecosistema.

Somos conscientes de que a posición do Concello da Coruña non é facil e que facer cambios é un proceso complexo e que leva tempo. Valoramos o feito de ser o primeiro goberno da cidade que considerou ao movemento okupa como interlocutor válido. E que tentara abrir posibilidades nun sistema pouco amable coa diversidade e baixo a presión de outras forzas políticas e institucións do Estado.

Pese a recoñecer esa disposición do goberno municipal actual, cremos tamén que non conseguiu ter a suficiente sensibilidade, respecto e coidado co proxecto político e social da Insumisa, cos seus procesos internos e cos sentimentos das persoas que o conforman.

Desde Proxecto Cárcere apoiamos o traballo da CSOA A Insumisa e recoñecemos o seu valor como parte da construción cultural e social da Coruña así como da recuperación de espazos abandonados e en desuso co que conleva de denuncia dun urbanismo depredador. Gustaríanos que o goberno municipal e os medios de comunicación aproveitasen o foco que se está a poñer na Insumisa para promover a reflexión e debate social sobre como facemos cidade, baseado en feitos e non na desinformación, que non se limite a criminalizar senón recoñeza o que poden aportar estas experiencias de  autoxestión.

Proxecto Cárcere


Outros espazos abandonados e/ou sen uso da Coruña – Convocatoria fotográfica “Coruña Baleira” do 2014

Coruña Baleira from Proxecto Cárcere on Vimeo.