Boletín Informativo – Setembro 2018

A Coruña, Setembro 2018

Aqui está o noso boletín que agora será mensal mais non por iso menos interesante.

Durante estas semanas estivéronse realizando diversas actividades no Cárcere e recibimos moitas visitas de viciñas, persoas que por diferentes razóns estiveron dentro destes muros ou teñen familiares que aqui esitveron. Tamén viñeron turistas que visitavan a nosa cidade, a Torre de Hércules, as praias e este edificio non lles pasou desapercibido.

 

Todas estas persoas nos regalaron momentos moi especiais e nos mostraron o seu apoio para a rehabilitación do edificio e deste proxecto cidadá.

Agora co inicio do curso as propostas de actividade multiplícanse e a xestión do espazo comeza a asentarse. Podedes ver información actualizada no noso blog PROGRAMACIÓN

E como vai esta relación entre Concello e as xentes do Cárcere? Pois aos poucos imos entendendo, non sen dificultades, cal é a responsabilidade da cada unha. Esperamos que finalmente o entremado burocrático se clarifique e sexa xusto e equitativo para todas.

Este mes comezamos tamén as reunións cos diferentes partidos políticos no goberno. Todos eles foron convidados e esperamos que todos podan vir a coñecer o Cárcere e se involucren nos obxectivos principais da campaña de sinaturas “O Cárcere: máis e mellor”:

1. Continuar coa rehabilitación do Cárcere. Incluíndo a realización inmediata das obras previstas para o verán.
2. Facilitar a xestión cidadá do inmoble. Promover e defender a capacidade da cidadanía para crear e organizar acción social e cultural.

Para isto é imprescindíbel un compromiso real das institucións, un diálogo aberto e de igual a igual onde se escoiten as diferentes perspectivas e onde, sobre todo, haxa vontade de cambio.

Unha vez terminados os encontros faremos un informe cos resultados e pasos a seguir.

Colocación da primeira pedra do “Novo Cárcere” en 1925

O 20 de setembro do 1927 inagurábase este cárcere, como consta na placa da entrada na que se menciona a mellora que supuxo para as condicións das persoas presas, e na que se fai referencia ao traballo incansable da visitadora de prisións Concepción Arenal.

Nesta semana faremos xunto coa CRMH (Comisión pola Recuperación da Memoria Histórica) unha pequena celebración recordando esta data 91 anos despois e as persoas que lá estiveron.

E continúamos…

 

La Coruña sentía el oprobio de tener por Cárcel un inmundo caserón que el Poder renovados del Directorio Militar acordó derruir sustituyéndola por este amplio y soleado edificio en que los delincuentes podrán cumplir de modo más humano la prisión a que sean sometidos por imperio de la Ley en consonancia con el espíritu que inspiró el apostolado social de la insigne pensadora gallega Concepción Arenal.

Los esclarecidos coruñeses adoptivos Don José Calvo Sotelo y Don Mario Muslera Planes cooperaron eficazmente a la realización de esta obra.

El Ayuntamiento de La Coruña al dar en este mármol forma perpetua a su gratitud desea que la hagan suya las generaciones venideras”

El Alcalde, Manuel Casas, 20 de Septiembre de 1927

Días abertos ao público

Días Abertos ao Público

Luns, Mércores e Venres a partir das 17:00

A apertura do Cárcere depende da actividade. Podes consultar regularmente no blog as propostas que vaian chegando e tamén no panel de información no Cárcere.

Continuará durante todo o mes a exposición “Jail Art” de arte postal e Obxectos do Cárcere e 7 anos de Proxecto Cárcere.

Seguiremos coas tarefas de limpeza e mantemento “Xornadas de Limpeza e Fermosura” que ser irán tamén comunicando semanalmente.

E as asembleas operativas, onde organizamos o traballo e decisións da semana os xoves 9 e 23 e mércores 16 e 30 de agosto ás 20h.

Podes utilizar o xardín externo e pórtico calquera día da semana. Simplemente respeta os acordos de uso para todas as persoas e actividade no Cárcere:

• Promover e respectar os dereitos humanos fundamentais: non machismo, non racismo, non homofobia/transfobia, non xenofobia…)
• Non realizar actividades de apoio e/ou divulgación de partidos políticos
• Deixar o espazo como se econtra ou melloralo, se for posibel.

 

🙂

 

 

 

 

Xornada de Apertura do Cárcere

Temos o pracer de convidarvos á Xornada de Apertura do antigo Cárcere da Coruña que terá lugar o sábado 4 de agosto de 11:30 a 23:30.

Con este evento queremos dar início á actividade pública dos primeiros 200 m2 deste emblemático edificio. Sabemos que é só abríndoo e dotándoo de vida que se poderá conseguir a súa rehabilitación total e uso para múltiples iniciativas da nosa cidade.

A nefasta política de feche e abandono do Cárcere durante os últimos 7 anos demostrou non ser a mellor das opcións para manter en boas condicións un inmoble protexido por patrimonio e de importancia arquitectónica e social para A Coruña.  Acollemos o reto de poñer a nosa enerxía e traballo para non deixar que iso siga a acontecer.

Por iso facemos un chamamento á asistencia a esta xornada así como a presentación de propostas e apoio aos fins deste proxecto para que o Cárcere sexa recuperado para todas nós.

O sábado comezaremos coa inauguración do Cárcere a cargo da Comisión pola Recuperación da Memoria Histórica, continuando coa entrada no espazo que se vai poder utilizar durante esta primeira fase de cesión de uso.

Dentro do edficio poderán verse as exposicións do “Jail Art” de arte postal, unha selección de Obxectos do Cárcere, e proxeccións e materiais dos 7 anos de loita da Asociación Proxecto Cárcere para rehabilitar e recuperar o Cárcere para a cidadanía.

Daremos logo paso ás actuacións e actividades coas que tan xenerosamente nos agasallan diversas artistas e colectivos da cidade que participan de forma totalmente altruísta.

Son d’Aqui, Cantareiras da Comuna, Micki y amigos, Samuel Galan, Antía Gómez Ortega, Alba Cotelo, Teatro Alfaiate, Gonçalo Guerreiro, Marcos Casás e Swing Coruña. Danza, música e teatro para non parar en todo o día.

Teremos un espazo para o xantar que se pode utilizar á vontade ou se se prefire traer a comida da casa ou utilizar os bares e restaurantes próximos.

Esperámosvos

Asemblea Xeral xullo 2018

Mañá domingo 29 ás 19h no Cárcere, terá lugar a Asemblea Xeral de xullo.

As Asembleas do Cárcere son abertas a todas aquelas persoas afíns aos principios e valores de recuperación do antigo cárcere da Coruña como centro sociocultural autoxestionado.

ORDE DO DÍA:

1. Organización Asemblea (5 min)
2. Manual de Funcionamento (30 min)
3. Información Xúridica (5 min)
4. Relacións co Concello (20-30 min)
5. Estratexias de Financiamento (Indagación) 30 minutos
6. Ramplas auto-construccións (10 minutos)
7. Apertura xestión de comunicación (10 minutos)
8. Avaliación rolda de prensa 26 de xullo (5 minutos)
9. Leitura acordos (5 minutos)
10. Avaliación e feche (5 minutos)

Boletín Informativo – 24 de Xullo 2018

A Coruña, 24 de Xullo 2018

Sen presa pero sen pausa imos sendo máis.

Esta semana continuamos cos traballos de limpeza e mantemento no Cárcere grazas ao labor e cariño incansable do voluntariado e do Grupo de Traballo de Loxística e Fermosura. Podes consultar datas no panel de entrada (foto) ou no noso blog Xornadas Abertas de Arranxo e merendola

O xardín da entrada está cada vez máis limpo e axeitado. A comunidade gatuna, que nos acompaña e que tan ben coidan Chus e cía, tamén parece agradecida e cada vez se achegan máis a nós.

Limpamos mobeis, imos adecuando as diferentes estancias, organizando o día a día do espazo e do proxecto.

E temos xa case finalizada a segunda rampla!

Moradoras e voluntarias coordinadas pola Comisión de Infraestruturas realizaron a do acceso da entrada.

Isto permitirá cumprir co noso obxectivo de que todas as persoas poidamos entrar no Cárcere para a Festa de Apertura.

As ramplas están construídas con materiais reciclables como estructuras mobeis temporais, respondendo a procesos orgánicos e espontáneos, onde prima cubrir en cada momento as necesidades do espazo e as persoas que o utilizan.

Grazas a todas!

Cada vez máis xente se aproxima ao Cárcere para preguntar sobre el e especialmente para falarnos del. Hai moita xente con historias moi interesantes de familiares ou delas propias que alí estiveron.

Hai tristeza, emoción… e sobre todo moito apoio por ter o espazo aberto, porque a xente poida entrar e recordar, e falar do pasado.

É bastante xeralizado o desagrado de que as autoridades responsabeis deixaran deteriorar o espazo deste xeito, sen facer nada para o rehabilitar ou darlle un novo uso. Din que é unha vergoña, nós tamén o pensamos.

Dá moito ánimo saber que non somos as únicas que temos o desexo de que se poida ir accedendo ao resto do edificio e que sexa para uso da xente, de todas nós.

Con este fin, seguimos alén do traballo físico coas nosas comisións de Comunicación, Xestión, Proxectos, Infraestructuras, coa Horta… a tope para facilitar a participación e comunicar o que se quere facer e como.

A Festa de Apertura vai collendo forma con artistas xa veteranas nas actividades de Proxecto Cárcere e outras novas que estamos desexando coñecer. todas elas de forma altruísta. E teremos información do que foron estes 7 anos de loita para poder entrar, limpar e darlle unha nova vida.

Se queres participar con algunha actividade fainos saber o antes posibel envíando email a proxectocarcere@gmail.com

Hoxe tivemos a primeira reunión da Comisión de Seguimento co Concello da Coruña. Nesta comisión participan 3 representantes do Cárcere  e 3 representantes do Concello. Ten como obxectivo establecer unha canle de diálogo de igual a igual, coordinada e fluída, e respectuosa coas necesidades e ritmos das diferentes partes.

De momento o volume de papeleo é considerábel e observamos que os procesos burocráticos van algo desaxustados coa actividade máis orgánica da acción social.

Somos conscientes de que esta é unha experiencia nova na cidade e que precisa dunha aprendizaxe mutua, capacidade de diálogo e tempo e paciencia. O que pensamos non falta a ningunha das partes.

Tamén nesta semana recibiremos aos medios de comunicación para informar sobre como está a ser este momento de entrada física no Cárcere e próximos eventos como a Festa de Apertura o sábado 4 de Agosto.

Seguimos informando

Xornadas Abertas de Arranxo e merendola no Cárcere

Vinde atusar e poñer fermoso o Cárcere!!

 

Convidámosos ás vindeiras tres Xornadas Abertas de Arranxo e merendola no Cárcere:

• O sábado 21 de xullo, de 12h a 14h e de 17h a 21h.
• O mércores 25 de xullo de 17h a 21h.
• O sábado 28 de xullo de 17h a 21h.

O Cárcere xa loce moito máis fermoso e agradable gracias ás á toda a xente que veu colaborar nas dúdas primeiras Xornadas Abertas de Limpeza. Conseguimos rematar as tarefas gordas de limpeza! Viva!  Nesta semana propoñémonos meternos xa en fariña con pequenas obras e labores de envelecemento. Se vos apetece facer masa, arranxar o xardín, lixar, pintar, crear un xardín colgante, crear unha sala de reunións, construir rampas-moble…e en xeral, traballar coas mans, vindevos ao Cárcere! Non se precisa experiencia.

Xa sabedes que se vos animades vos convidámosvos a merendar conosco e o sábado, tamén ao vermú.  Podedes contribuir tamén vós con algo para compartir na merendola. O que si, traede roupa de trote, que o Cárcere segue deixando pegada!

​

​

Se vos morredes por coñecer o Cárcere ou reencontrarvos con ela e tedes un oco nas vosas axendas, esperámosvos!

Un saúdo,

Equipo de Loxística e Fermosura do Cárcere

Boletín Informativo – 16 de Xullo 2018

A Coruña, 16 xullo 2018

E xa comezamos a abrir o Cárcere.

Esta semana tivemos dúas xornadas de limpeza con merendola. Veu xentiña a nos axudar e a interesarse polo proxecto. Veciñas do barrio, Espiga, Oasis, voluntarias individuais, xente nova e turistas que tamén se achegaron a coñecer sobre o Cárcere.

Foi un gusto ver por fin este espazo cheo de xente.

Tivemos tempo de traballar, de comer e de cantar, grazas ás pandereteiras da querida Comuna que sempre están aí para o que faga falta.

Tamén coñecimos ao colectivo Recetas Urbanas que ofreceron o seu saber facer e poidemos completar unha das rampas que precisa o Cárcere. Moitísimas grazas!

E xa temos data para a Festa de Apertura, será o sábado 4 de agosto durante todo o día. Haberá actuacións, exposicións e máis sorpresiñas e sobretodo será un momento para que todas as persoas interesadas vos acheguedes a coñecer o espazo e saber como funciona.

Daí para adiante o Cárcere estará aberto para todas.

Semana a semana, seguiremos informando.

 

Animádesvos a vir poñer o Cárcere fermoso?

Convidámosos a dúas Xornadas Abertas de Limpeza e merendola no Cárcere:

• O mércores 11 de xullo, de 17h a 21h.
• O sábado 14 de xullo de 17h a 21h.

As moradoras do Cárcere estamos a traballar en poñela bonita e sacarlle lustre de cara a súa presentación en sociedade nas vindeiras semanas. Queremos convidarvos a colaborar connosco nestas tarefas e limpeza e pequenas obras de mellora. Temos moitas tarefas na nosa lista! Seguro que algunha vos ha prestar!

Ás que vos animades a vir botarnos unha man, convidámosvos a merendar conosco: café, te, zume, pastas, froita e boa compaña. O que si, vide con roupa de trote, que o Cárcere deixa pegada!

​Se vos morredes por coñecer o Cárcere ou reencontrarvos con ela e tedes un oco algunhas desas tardes, aquí vos esperamos!

Un saúdo,

Equipo de Loxística e Fermosura do Cárcere

Proxecto Cárcere

Boletín Informativo – 8 de Xullo 2018

A Coruña, 8 de Xullo 2018

E como van as cousas no Cárcere?

Pois as obras interiores do espazo co que imos abrir xa están rematadas. Temos o baño adaptado terminado e xa temos algúns mobles cos que comezar a funcionar. E café e wifi!

Habitat social e Espiga vannos axudar cos traballos de acondicionamento. Moitísimas grazas!

Fáltannos as rampas de acceso. Xa comentamos que para nós é fundamental que todas poidamos entrar no Cárcere. Comunicámonos co Concello para que nos deran información ao respecto.

E case rematando o Manual de Funcionamento, do que xa podedes ver cada vez máis información no noso blog.

No Cárcere podemos participar todas, tanto asistindo a eventos ou achegándonos a coñecer o espazo, como presentando actividades puntuais ou proxectos de medio-longo prazo.

E tamén, e o que diferencia este proxecto doutros, é que ti podes ser parte do traballo común de facer que todo isto sexa posíbel. Podes participar na organización ou simplemente axudar con algunha das tarefas que se van presentando.

A cidadanía collendo a responsabilidade e capacidade de toma de decisións sobre os espazos públicos, sobre os seus usos e priorizando as súas necesidades sobre outros intereses, é un dereito e unha oportunidade que nos ofrece o Cárcere hoxe.

Se queres saber máis contáctanos en proxectocarcere@gmail.com

E por último, pero non menos importante, avisárvos de que andamos xa a preparar unha nova Xornada de Benvida, para aquelas que queirades participar no Cárcere, e unha Festa de Apertura á que estades todas convidadas das que daremos datas en próximos boletíns.

Unha aperta forte

Boletín informativo – 26 de Xuño 2018

26 de Xuño 2018, A Coruña

O pasado venres encontrámonos cos proxectos que levaban pacientemente esperando durante meses a apertura do cárcere. Co espazo disponibel minguado e un uso máis restricto algunhas iniciativas non poderán realizarse nesta primeira fase de entrada.

Asociación culturais, aprender a tocar a gaita, conectar as mulleres do barrio coa historia e futuro do cárcere, así como actividades sobre a mobilidade en bicicleta, son algunhas das ideas que se achegaron e que esperamos podan comezar a súa actividade en breve.

Agora toca dar paso a novas propostas e é aqui onde precisamos da túa colaboración, tanto considerando facer unha proposta ti ou o teu colectivo como divulgar entre xente que poida estar interesada.

Actividades e proxectos non é a única maneira de entrar no cárcere. No noso blog creamos un apartado especial onde explicamos que se pode facer e como. Seguro que encontras algo con xeito para ti.

ENTRA NO CÁRCERE!

Aos poucos iremos actualizando a información desta sección e adecuando outros apartados para este momento en que pasamos da teoria e do soño á práxis.

Ficade atentas.

Reunión cos Proxectos

​