7º ANIVERSARIO DE PROXECTO CÁRCERE

O 20 de Novembro facemos 7 anos en Proxecto Cárcere e queremos convidarvos a unha pequena celebración o Domingo 19 ás 17h en frente do Cárcere da Torre.

Faremos unha acción, como é habitual, leitura de manifesto, e un brinde polos 7 anos. Todo amenizado con música do país.

Gostaríanos moito que vos unísedes a nós, especialmente neste momento en que estamos tan próximas de entrar no cárcere.

Un especial agradecimento a todas as persoas, colectivos e organizacións que durante este tempo estivestes dun xeito ou outro connosco.

“Nunca dubide que un pequeno grupo de persoas conscientes e unidas poda ser quen de mudar o mundo; de facto, sempre foi somente así que o mundo mudou”

Fritjof Capra

 

Hai 7 anos permitímonos soñar que un espazo que albergara dor e sufrimento podería tornarse nun lugar onde a creación e o pensamento libre invadiría as nosas vidas.

Emocionámonos coas historias que contaban as súas paredes, as persoas que narraran a súa vivencia desde dentro e desde fóra do cárcere da Torre.

Unha mestura de tristeza e curiosidade e crecente ilusión metéusenos no corazón e xa non nos abandonou máis nunca.

Foron moitas as persoas que compartimos este soño e con cada unha delas íase facendo máis e máis grande, e máis e máis forte.

Persoas a nivel individual e outras pertencentes a grupos de diversos ámbitos uníronse ao que deu en chamarse Proxecto Cárcere.

O camiño foi longo, máis longo do que pensabamos, e non libre de dificultades. Tivemos que ser testemuñas de como un edificio baleiro, sen uso, nin proxectos a corto ou longo prazo por parte das institucións responsabéis, ía deteriorándose sen poder nós facer nada. Non podíamos entender como as institucións non se alegraban pola mobilización da cidadanía para construír cultura desde abaixo, coas súas propias mans, simulando ás mans que antes das nosas, e das propias institucións, construíran esta cidade.

É só posíbel darlle vida a expresións sociais, musicais, educativas, artísticas… se estas xurden daquelas persoas que cada catro anos ocupan desde un partido político X a xestión da sociedade? Non é factíbel e tal vez máis sustentábel que haxa proxectos que sexan xerados polas propias cidadás procurando unha continuidade alén de mandatos con data de caducidade? Non sería máis adecuado que estes procesos de creación e participación puidesen adecuar os tempos ás súas necesidades, en vez de que sexan os tempos administrativos os que determinen o seu inicio e fin de vida?

Como se pode demandar unha sociedade madura e participativa se non se lle permite acceder á práctica, á experiencia física de experimentar, acertar e errar, como condición indispensábel para a súa propia aprendizaxe e desenvolvemento?

En Proxecto Cárcere apostamos polas persoas e pola creación de proxectos que podan sobrevivir dacordo aos seus propios ritmos e necesidades. Non esperamos que todos eles sexan gañadores de antemán, precisamente este pretende ser un lugar onde poder soñar e crecer sen corsés convencionalistas. Será precisamente ese lugar onde comezar a escribir a nosa historia e onde se nos permitirá borrar, facer tachóns, intentar e volver a comezar se for necesario.

Para que isto fose posibel tivemos que resistir durante 7 anos e foi sen ningunha dúbida grazas ao apoio e respecto de todas vós. Por iso, agora, no ano 2017, no que conseguimos que o cárcere da Torre pase a mans da cidadanía da Coruña, sentímonos moi orgullosas pero principalmente moi agradecidas a todas aquelas persoas, grupos e organizacións que durante todo este tempo formaron dunha maneira ou outra parte de Proxecto Cárcere.

Grazas á Concellería de Cultura do bipartito BNG-PSOE do 2010 por organizar os Encontros sobre novos modelos participativos de xestión cultural. Foi neles onde se plantou a semente da que xurdiría Proxecto Cárcere.

Grazas a todas as persoas e colectivos que a pesar das dificultades e de ter o Nadal próximo se reuniron durante os primeiros meses para darlle forma ao que sería a plataforma cidadá.

Grazas a todas as que estando activas ou non no día a día da plataforma quixestes mantervos informadas, colaborar puntualmente ou asistir aos eventos que se organizaron e seguir sendo parte da lista de participantes de Proxecto Cárcere.

Grazas a todas as artistas e colectivos que lanzastes propostas en tempo récord para montar as Xornadas de Portas Abertas do 2011. Grazas a todas as que asististes durante eses 4 días onde vimos o noso soño facerse, brevemente realidade. Xa nunca o puidemos esquecer.

Grazas a Rede Transibérica de Espazos Culturais Independentes, que nos acolleron como unha máis desde o inicio a pesar de nós non ter espazo físico. Grazas polo recoñecemento que sempre nos destes e especialmente grazas por decidir organizar o IV encontro na nosa cidade no ano 2015 e falar coas institucións daquel momento para mostrarlles a viabilidade deste proxecto a través da vosa experiencia.

Grazas a Cuac FM por darnos como premio “Oscuac 2011”, ao mellor colectivo da cidade, unha hora de emisión de radio durante 3 meses. Gustounos tanto que resultou nun programa “Ondas do Cárcere” fundamental na nosa historia desde 2012 .

Grazas ao COAG (Colexio Oficial de Arquitectxs de Galicia) e á ETSAC (Escola Técnica Superior de Arquitectura da Coruña) polo seu apoio, convites, colaboración en diferentes ocasións ao longo destes 7 anos. Especialmente grazas ao estudantado polos seus proxectos de Fin de Carreira sobre o cárcere.

Grazas a todas as que enviastes propostas para o cárcere na campaña “E ti que farías aqui?”. Foi coa vosa xenerosidade e boas ideas que poidemos elaborar o Plan de Viabilidade, documento fundamental deste proxecto que hoxe continúa a ser de referencia para nós e para todas as que o queiran utilizar.

Grazas a todas as que participastes nas diferentes accións de divulgación do proxecto e denuncia do estado do cárcere, a Brigada de Limpeza, o Jail Art, SOS Cárcere da Torre, no Coruña Baleira, Jail Vermús, Tempo de Cereixas, Aniversarios, etc.

Grazas por convidarnos a diferentes eventos, congresos, xornadas para presentar o noso proxecto de recuperación dun cárcere en desuso en centro sociocultural e da memoria.

Grazas as persoas artistas e músicas por regalarnos a vosa creatividade en cada ocasión que volo pedimos, e esas outras en que nola ofrecestes vós directamente.

Grazas a todos os colectivos, establecementos e particulares que nos cedestes o voso espazo para poder facer reunións e asembleas semana si e semana tamén. Sen vós a nosa vida tería sido moito máis complicada.

Grazas aos diferentes partidos políticos que nos recibistes e especialmente aos que crestes nesta proposta, estiverades no goberno ou non, e que o seguides a facer.

Grazas aos medios de comunicación, prensa, radio, televisión, que ao longo deste tempo atendestes as nosas notas de prensa, cubristes os nosos eventos, aínda que estes foran humildes, e quixestes informarvos e informar a cidade con veracidade e profesionalidade.

Grazas a todas as persoas e colectivos que estades a presentar proxectos en firme para a próxima apertura do cárcere.

E grazas a todas e cada unha das persoas coas que compartimos tardes, noites, ilusións e desacougos desde o día 1 ata hoxe. Grazas á Asemblea de Proxecto Cárcere, grazas ao grupo coordinador, grazas aos grupos de traballo de Infraestruturas, Comunicación, Financiamento, Xestión, Proxectos, Hortas, Memoria, Radio e Escola.

Sen todas vós isto non tería sido posibel.

En 2018 as portas do cárcere volven estar abertas para ti

Advertisements

Asemblea de Outubro 2017

Convócase a Asemblea de Outubro para o venres 27 de 17h a 19h no local de Son d’Aqui (Rúa Valencia, 2, Monte Alto)
 
ORDE DO DÍA
1. Organización Asemblea (5 minutos)
  1. Proposta de organización Asemblea (5 minutos) – GdT Escola

  2. Solicitude para facer un traballo universitario sobre o cárcere (5 minutos) –

  3. Estado de contas  (5 minutos) – Gdt Financiamento

  4. Introducindo o consenso en PC (10 minutos) Gdt Escola

  5. Organización sesións de información e debate (15 minutos) GdT Escola

  6. Avaliación reunión co Concello (10 minutos) Grupo asistente

  7. Espazo de reflexión e debate (30 minutos)

  8. Leitura dos acordos da Asemblea (5 minutos)

  9. Avaliación Asemblea e feche (5 minutos)

O paseo de Jane. Roteiro por Montealto

O vindeiro sábado 13 de maio imos camiñar un pouco por Monte Alto. Se mirades máis abaixo poderedes ver a ruta.
Sendo onde é xa sabedes que costas vai haber, pero levaremos ritmo de persoa con vida sedentaria, así que vinde sen dubidalo: crianzas, maiores, bici debaixo do brazo, can… A actividade é totalmente aberta e non require coñecementos previos.


Quen era Jane Jacobs?
Jane Jacobs foi unha teórica e activista no ámbito do urbanismo. Non tiña formación académica nel, pero participou en varias loitas relacionadas coa planificación urbanística en NY e Toronto e publicou varios libros ao respecto (O principal, The Death and Life of Great American Cities).
Entre as cousas que defendía están as seguintes:
– A importancia das beirarrúas e do espazo peonil fronte á mobilidade baseada no vehículo privado.
– A necesidade de que exista contacto entre a veciñanza dun lugar.
– A preferencia por unha cidade que sexa variada e interesante por enriba dun exceso de ordenación.
– Os puntos anteriores, e outros, fan que unha cidade desexable para vivir sexa aquela na que os barrios son ecosistemas complexos, con variedade de usos, e onde a veciñanza se responsabiliza do lugar no que vive, nun proceso que se transmite de forma natural.

Que son os paseos de Jane?
Trala súa morte, parte da comunidade máis próxima a Jane Jacobs decidiu comezar a celebrar a data do seu nacemento organizando camiñadas que permitisen a interacción entre a veciñanza e os lugares que habitan. Desde a primeira acción, levada a cabo hai dez anos, os paseos comezaron a estenderse polo mundo adiante e agora moitas cidades os organizan, nesa data ou mesmo durante o resto do ano.
Pra saber máis:
http://www.culturagalega.org/noticia.php?id=27280
http://www.rtve.es/alacarta/videos/la-aventura-del-saber/aventurampaseo/3880752/

Por que facer un paseo de Jane?
Por que non? Un roteiro polo barrio onde se localiza o vello cárcere provincial é unha boa forma de coñecelo e ao mesmo tempo, de que nos coñezan.
Poderíamoslle ter chamado simplemente iso, roteiro, pero gústanos o concepto do paseo-conversa que representan os jane’s walks, e sentímonos moi próximxs a esas ideas de jacobs que enumerábamos antes. Esa visión do barrio como un espazo complexo e grande variedade (de usos, idades, horarios…), coidado polxs seus habitantes, é perfectamente extrapolable ao cárcere.
Por outra parte, a connotación dos paseos en relación coa prisión é terrible pero, sen querer esquecer esa parte da historia do noso cárcere, decidimos seguir adiante co nome, comezar a asocialo a algo bo, voluntario e libre.

Como vai ser?
A orixe da ruta está nunha cartografía de lugares que foron ou son centros sociais ou puntos de reunión e actividade social do barrio de Monte Alto, e de aí foron saíndo outras cousas: algo de historia, algo de toponimia, moito de recordos de infancia… Finalmente o roteiro queda así:

Campo de Marte ás 11:00h, puntuais. Punto de encontro.
Praza Coro Cántigas da Terra.
Verea do Polvorín, 35. Se non chegades ao Campo de Marte podedes sumarvos á camiñada en calquera punto, pero se non nos atopades, ás 12:29 estaremos seguro no Centro Social A Comuna.
Rúa do Faro, 6.
Parque Carlos Casares, xunto á rúa Pedro Galán Calvete.
Cárcere da Torre (Non, non se pode entrar).

A hora estimada de fin do roteiro son as 13:30h, diante do cárcere. Alí haberá xantar comunitario, de balde. Compramos comida en cantidades galegas, pero por se de súpeto as nosas expectativas máis optimistas se visen superadas, aquelas persoas que veñades ao roteiro teredes un papeliño para asegurar que non pasades sen comer.
A partir das 13:30 e ata que o corpo dxs músicxs aguante haberá acompañamento de:
A.C. Son d’aquí
Gonçalo Guerreiro e banda
8hz

Esta actividade é unha das dúas que se enmarca dentro da proposta de Proxecto Cárcere seleccionada na convocatoria de #CulturaDeBarrio da Concellería de Culturas da Coruña.

Mapa da ruta: http://goo.gl/M9hZ95

Xornada de Traballo para comezar o 2017

Desde Proxecto Cárcere en transición imos facer unha xornada de traballo co obxectivo principal de redactar a proposta de uso sociocomunitario do antigo cárcere da Torre que imos presentar ao Concello da Coruña.

A xornada terá lugar ao longo do luns 9 de Xaneiro. Se estás interesada en participar contáctanos en proxectocarcere@gmail.com para máis información.

Feliz Ano Novo!

 

Reunión co Concello antes de Nadal

Este xoves 22 de Decembro pola mañá reunirémonos no Concello da Coruña con Xiao Varela da concellería de Urbanismo, Infraestructuras e Equipamento e Claudia Delso da concellería de Participación e Innovación Democrática, para falarmos das propostas de Proxecto Cárcere para o antigo cárcere da Torre no contexto que presenta a eminente cesión de usos socioculturais do SIEP ao Concello.

Convidamos a todas as persoas interesadas á asemblea que teremos na mesma tarde do xoves às 20:30 no CSO A Insumisa.

Nesta Asemblea imos informar sobre o proceso deste último ano en que Proxecto Cárcere solicitou por rexistro o uso do edificio e estivo a reunirse co Concello. Presentaremos a nosa proposta de xestión e uso público desde a cidadanía para este espazo abandoado, en preocupante estado de deterioro e sen ningún uso nos últimos 6 anos. E abriremos un espazo de debate para concluir cos pasos a seguir daqui pra diante.

Os obxectivos principais de Proxecto Cárcere son:

  • Rehabilitación e mantemento do edificio para evitar o seu progresivo deterioro en base a principios de sustentabilidade, manter a estrutura orixinal do edificio, respecto co medio ambiente e compromiso coa economia local e social
  • Uso público e enfocado nas necesidades da cidadanía do total do edificio.
  • Gradual acondicionamento dos diferentes espazos do cárcere dacordo aos usos reais que vaian xurdindo tendo en conta os principios de adaptabilidade, bioconstrucción, participación e baixo custo.
  • Xestión cidadá do espazo considerando as dinámicas naturais da participación colectiva en que se prioricen as persoas sobre os resultados, se valorice e potencie as iniciativas xurdidas desde as cidadás e cidadáns e onde a experimentación e o erro formen parte dunha aprendizaxe sólida e para toda a vida.
  • Creación aberta dun espazo sociocultural e da memoria con visión no medio e longo prazo, de beneficio para a cidadanía e que transcenda o marco de 4 anos de lexislaturas de un outro partido político.

Seguiremos informando.

Podes contactarnos enviando email a proxectocarcere@gmail.com e participar nas nosas asembleas.

Asemblea de Decembro: “O cárcere pro pobo”

Con esta frase “O cárcere pro pobo” iniciámos 6 anos atrás un camiño apaixonante onde os soños non tiñan límites e a creación e colaboración colectiva foron as nosas ferramentas de  traballo.

Hoxe, coa nova da cesión por parte do SIEP (Ministerio de Interior) de usos socioculturais ao Concello da Coruña, ábrese unha porta que ata agora parecía fechada.

Desde Proxecto Cárcere queremos nesta última asemblea do ano compartir o que foi o proceso para nós, como se encontra o grupo neste momento e  que propostas temos para materializar un uso e xestión cidadán para o cárcere.

Abrimos pois o espazo para o debate pois entendemos que é o momento de escoitar as voces que sempre estiveron nesta aventura, desde a perspectiva do tempo, así como coñecer novas enerxías e visións deste momento do aqui e agora. Sabemos por experiencia que abrir as portas non fai mais do que darlle vida a esta filosofía que entre todas construímos nesta cidade a través humildemente do Proxecto Cárcere.

Esperámosvos o xoves 22 de Decembro ás 20h30 no CSO A Insumisa.

ASEMBLEA DE DECEMBRO

Día: Xoves 22 de Decembro 2016

Hora: 20:30

Lugar: CSO A Insumisa (avenida do metrosidero, fronto o acuartelamiento de Atocha) – Sala de Video

Orden do día:

  1. Presentación asistentes. (5 minutos)
  2. Avaliación da actividade dos Proxectos Fin de Carreira da Faculdade de Arquitectura  na Fundación Luis Seoane (10 minutos)
  3. Como está a cesión SIEP – Concello. Como foi o proceso e como se posiciona Proxecto Cárcere. (30 minutos)
  4. Presentación propostas para a entrada da cidadanía no Cárcere (20 minutos)
    • Vías de negociación PC-Concello para cumprir cos obxectivos:
      1. Rehabilitación e mantemento do edificio
      2. Espazo aberto xestionado por e para a cidadanía
    • Presente e futuro de Proxecto Cárcere.
    • Transformar o Plan de Viabilidade en Plan de Entrada – fase 1
  5. Ideas e debates (40 minutos)
  6. Pasos a seguir (20 minutos)

Pódese consultar o Plan de Viabilidade de Proxecto Cárcere AQUI